Russen på Framnes kristne vidaregåande skule i Norheimsund i Hardanger har samla inn nær 1,2 millionar kroner til Mercy Ships. Det tradisjonsrike årlege misjonsprosjektet på skulen slår stadig rekordar. På årets avslutningsfest overleverte leiarane i misjonsprosjektet, Håvard Drange og Kristin Eskeland, ein stor sjekk på 1.160.000 kroner til Erling Natvig frå Mercy Ships Norge.

Det tradisjonsrike årlege misjonsprosjektet på skulen slår stadig rekordar. På årets avslutningsfest overleverte leiarane i misjonsprosjektet, Håvard Drange og Kristin Eskeland, ein stor sjekk på 1.160.000 kroner til Erling Natvig frå Mercy Ships Norge. Leiinga for den internasjonale hjelpeorganisasjonen er mektig imponert over innsatsen og den store gåva.

Skulen har lagt til rette for engasjementet, men prosjektet er hundre prosent elevstyrt. Også elevane i fyrste og andre klasse har støtta prosjektet aktivt, og gjer ser klare til det er deira tur.

Pengane har dei fått inn på ei rekkje aktivitetar, som misjonsløp, sponsing, lotteri, kafédrift, ”måneskinsturar” og ei lang rekkje andre kreative påfunn.

Ungdommeleg pågangsmot

Det starta som ein optimistisk draum og eit ambisiøst mål om å nå ein million kroner. No har draumen gått i oppfylling, og vel så det. Ungdommeleg pågangsmot og hjartevarme – og glade gjevarar – har skapt eit unikt resultat.

– Det er svært motiverande å sjå at målet er nådd, men det viktigaste er kva dette betyr for fattige menneske i Afrika som ikkje har tilgang på sjukehusbehandling for alvorlege lidingar, seier leiar i misjonsprosjektet, Håvard Drange.

Ifølgje Drange kan det medisinske personalet om bord i MS Africa Mercy til dømes gje over seks hundre blinde synet tilbake, eller meir enn tre hundre menneske kan få fjerna store og livstrugande godarta kreftsvulstar i ansiktet for denne pengesummen.

– Mange menneske får eit nytt liv. Det er det viktigaste, seier leiar i misjonsprosjektet, Håvard Drange.

Drøym stort

Drange rosar medelevane sine for det store engasjementet i saka.

– Dette er eit prosjekt alle har drege lasset i lag. Utan at medelevane mine hadde vore så flinke til å ta initiativ og vera pådrivarar hadde me ikkje klart å nå målet. Misjonsprosjektet har vore ”alle sitt prosjekt”. Samstundes har leiinga i Mercy ships vore veldig flinke til å følgja prosjektet opp, seier Drange.

Det ligg mykje arbeid bak misjonsprosjektet, men Drange klagar ikkje.

– Det har teke tid og krefter, men prosjektet har gjeve meir enn det har teke. Dette er eit arbeid som går frå hjarta til hjarta, seier han.

– Kva har misjonsprosjektet gjort med dykk?

– Me har sett at Gud er større enn me trudde. Det har også lært oss at det kan vera lurt å drøyma stort. Me har så lett for å avgrensa oss sjølve. Dette er ein fin lærdom å ta med seg vidare, seier han.

Neste år er det den flybaserte hjelpeorganisasjonen Mission aviation fellowship (MAF) som vert mottakar av misjonsprosjektet på Framnes. Det er elevane som avgjer kven prosjektet går til, ved avstemming, etter ein presentasjonsrunde av ulike kandidatar på skulen.

MAF sitt prosjekt vert kalla Medical safari, som mellom anna går ut på å bringa legehjelp og anna naudsynt hjelp til isolerte landsbyar i Tanzania.

Bilde: Årets russekull på Framnes kristne vidaregåande skule i Norheimsund i Hardanger. Avslutningsdagen.

Redaksjonen
28.06.2012 17:18

<--Tilbake      Tips en venn